ست الستات
الأحد 21 فبراير 2021 الساعة 08:48 (سما -متابعات)

ست الستات
فى أحد البرامج التليفزيونية عندما سأل الفنان والممثل المصرى أحمد مظهر عن الممثله فاتن حمامه فى (دعاء الكروان) يقول .. الست فاتن كانت مهوله و يستفيض بكلام موزون عن أخلاقها و موهبتها .. ثم تسأله المذيعة عن الممثلة شادية كان يجيب عن (الست) شاديه إنها متفردة .. الخ .
 يتكلم عن فيلم ( أيام الحب ) وعن حضور (الست) ناديه لطفى .. لحد اما إستوقفته المذيعه و قالت له .. هو حضرتك يا أستاذ أحمد ليه بتقول على كل زميله قبل إسمها لقب ( ست(  !؟
أجاب الفنان القدير .. لإنهم ستات .. ستات بجد و ده أقل وصف يتنادوا بيه يا بنتى .. ده مافيش أعظم من اللقب ده يتوج معنى وجودها ... 
وإستكمل حديثة  .. ده كان أقل حاجه نعملها و نتفق عليها كلنا ك رجاله فى وقتنا إنه اسامينا تبقى وراهم .. كلنا كلنا .. رشدى و كمال و عمر و انا .. لم نجروء نطلب نتكتب قبلهم .. ربنا لما خلق الست خلقها تاج .. إنتى عمرك شفت بلد إسمها مُذكر ؟ 
أجابت المذيعة .. الله يا أستاذ على كلام حضرتك طب نفسى أسأل حضرتك سؤال هو إيه اللى حصل و غيرنا كده ؟ 
أجاب .. لاء ما اعرفش يا بنتى .. أنا صحيت فى يوم لقيت الهواء وحش وبطلت أشم ريحة الورد فى الجنينه ، لقيت الناس ما بتضحكش فى وش بعض ، بطلوا يتلموا أول خميس من كل شهر على حفلة الست  وبطلوا يكتبوا لبعض جوابات الا فى الضروره .. بالك إنتى الجوابات دى ليها مفعول السحر .. بنحضر الكلام و بنكتبه من أرواحنا ..
وأنهى كلامه بهذه العبارة .. "مصر ست جميله أوى يا بنتى و ما تستاهلش كده أبداً "
وحديثى لكل ست .. لا تجردى نفسك من لقبك حتى لو ما تعملين .. يكفى إنك ست البيت .. لا يجب أن ينادى عليك أحد بدون ألقاب .. من يناديك بإسمك بدون ألقاب يبدد طاقتك ويكسر هالتك مثل من يجردك من ملابسك .. أنتى طبيبة مهندسة معلمة يجب أن يسبق إسمك لقب لأى شخص ينادى عليك .. حتى لو ما تعملين يكفى إنك ست الستات.

مها العطار

تعليقات القراءالتعليقات المنشورة لا تعبر عن الموقع وإنما تعبر عن رأي اصحابها.
شارك برأيك
الأسم
الموضوع
النص
واحة الأدب
مؤمن شوقي المقطري *تهامة* مؤمن شوقي المقطري
حافظ مطير الرعاة والأشباح حافظ مطير